Social Icons

Featured Posts

Wednesday, 21 February 2018

SIKU SABA ALIZOTOA WAZIRI KIGWANGALLA ZAZAA MATUNDA

Wiki chache zilizopita Waziri wa Maliasili na Utalii Dk Hamisi Kigwangalla alitoa siku saba kwa polisi kukamata watuhumiwa wa mauaji ya mwanaharakati dhidi ya mauaji tembo Wayne Lotter, pia alitaka nyumba zilizouzwa kinyemela huko Arusha zirudishwe na pia alitoa siku saba kwa wakurugenzi wa kampuni nne za uwindaji kukutana nae Dodoma.
Jana kwenye kipindi cha 360 Waziri Dk. Kigwangalla alitoa maelezo ya kina kuhusu maelekezo aliyotoa na pia kuelezea mikakati mbalimbali ya Wizara yake. Kuhusu mauaji ya Lotter alisema kuwa watuhumiwa walikamatwa na kufikishwa mahakamani. Alimsifu IGP Sirro kwa ushirikiano na Wizara yake.
Alieleza kuwa Katiba inatambua Waziri kama sehemu ya Serikali na kwamba Polisi wapo ili kusaidia Serikali kutimiza malengo yake. Kuhusu nyumba za Arusha, alieleza kuwa ushahidi unaonyesha wazi kuwa waliotajwa walikuwa wamiliki wao binafsi au kupitia familia zao. Waziri Dk.Kigwangalla alieleza mkakati wa kufungua na kukuza utalii kusini mwa Tanzania.
Alieleza mradi wa regrow ambao utawezesha sekta ya kukua kusini mwa Tanzania. Pia alizung umzia umuhimu wa uhifadhi na kueleza kuwa mto Ruaha kwa sasa unakauka kwa siku 60 wakati wa kiangazi na malengo ni kurejesha hadi kukauka kwa siku 10 tu. Kuhusu kutangaza vivutio, Waziri Dk.Kigwangalla alieleza mkakati wa kutangaza vivutio na pia uanzishwaji wa mwezi wa urithi ambao sio tu utaongeza vivutio vya utalii bali utaenzi tamaduni na mila za Kitanzania.

Tuesday, 20 February 2018

DKT. KIGWANGALLA AFANYA ZIARA YA KUSHTUKIZA BODI YA UTALII (TTB)



 Waziri wa Maliasili na Utalii, Dk. Hamisi Kigwangalla akizungumza na uongozi wa bodi hiyo baada ya kufanya ziara ya kushtukiza mapema leo tarehe 20 Februari, 2018.

Na Mwandishi Wetu, Dar es Salaam
...........................................................................

Waziri wa Maliasili na Utaliii, Dkt. Hamisi Kigwangalla leo Februari 20, 2018, amefanya ziara ya kushtukiza katika ofisi za Makao makuu ya Bodi ya Utalii Tanzania (TTB) Jijini Dar es Salaam na kuitaka kufanya kazi kwa kasi na ubunifu zaidi.

Akizungumza na viongozi wa Bodi hiyo, Dkt. kigwangalla amewataka kuongeza kasi zaidi katika kutangaza Utalii wa Tanzania ikiwa ni pamoja na kuanzisha studio ya kimataifa ya kutangaza vivutio vya Tanzania ndani na nje ya nchi kwa kutumia lugha mbalimbali za Kimataifa.

Aidha,amewataka kuharakisha zoezi la uwekaji wa mabango yanayotangaza Utalii wa Tanzania katika viwanja vya ndege hususani uwanja wa ndege wa Kimataifa wa Mwalimu Nyerere Dar es Salaam (JNIA).

Hata hivyo amewataka pia kujikita zaidi katika matumizi ya mitandao ya kijamii kwa kuhakikisha inahuishwa mara kwa mara.

Pamoja na hayo, ameiagiza bodi hiyo, kushirikisha wadau mbalimbali wanaotoa huduma za Utalii ikiwemo madereva taxi na Marubani kwa kuwapa elimu ya kutangaza utambulisho wa Tanzania kupitia Utalii na vivutio vilivyopo.

Akiwa katika ofisi hizo ndani ya jengo la Utalii House, alikagua ofisi mbalimbali za bodi hiyo pamoja na zile za Shirika la Hifadhi za Taifa Tanzania (TANAPA) na kupata maelezo machache kutoka wa maafisa wa Shirika hilo.
 Waziri wa Maliasili na Utalii, Dk. Hamisi Kigwangalla akizungumza na uongozi wa bodi hiyo baada ya kufanya ziara ya kushtukiza mapema leo tarehe 20 Februari, 2018.
 Waziri wa Maliasili na Utalii, Dk. Hamisi Kigwangalla akiongozwa na Mkurugenzi Mtendaji wa Bodi hiyo, Devetha Mdachi kukagua mazingira ya ofisi hiyo mapema leo tarehe 20 Februari, 2018.
Waziri wa Maliasili na Utalii, Dk. Hamisi Kigwangalla akiongozwa na Mkurugenzi Mtendaji wa Bodi hiyo, Devetha Mdachi kukagua mazingira ya ofisi hiyo mapema leo tarehe 20 Februari, 2018.
Picha ya pamoja ya Waziri wa Maliasili na Utalii, Dk. Hamisi Kigwangalla na uongozi wa bodi hiyo baada ya kufanya ziara ya kushtukiza mapema leo tarehe 20 Februari, 2018.

Wednesday, 14 February 2018

HIFADHI YA MIKUMI YAIOMBA SERIKALI KUCHEPUSHA BARABARA YA LAMI INAYOPITA NDANI YA HIFADHI HIYO



Na Hamza Temba-WMU-Morogoro
................................................................
Serikali inafikiria namna bora ya kubadilisha uelekeo wa eneo la kilometa hamsini za barabara ya lami inayopita ndani ya Hifadhi ya Taifa ya Mikumi au kutoza kodi ya utalii kwa watu wanaotumia barabara hiyo ili kukabiliana na changamoto mbalimbali zinazosabishwa na barabara hiyo kwenye uhifadhi.

Hayo yamesemwa mkoani Morogoro na Waziri wa Maliasili na Utalii, Dk. Hamisi Kigwangalla kufuatia ombi la uongozi wa hifadhi hiyo la kuiomba Serikali kuchepusha barabara hiyo kutokana na athari mbalimbali za kimazingira zinazosabishwa na uwepo wa barabara hiyo ndani ya hifadhi hususan vifo vya mara kwa mara vya wanyamapori, ujangili na ukosefu wa mapato ya Serikali.

Awali akiwasilisha taarifa ya hifadhi hiyo mbele ya Waziri Kigwangalla, Kaimu Mhifadhi Mkuu wa Hifadhi hiyo, Gerald Mono alisema licha ya barabara hiyo kuwa na fursa nyingi za kimaendeleo imekuwa na changamoto nyingi kwenye uendeshaji wa shughuli za uhifadhi.

Alisema wastani wa mnyamapori mmoja hugongwa na gari kila siku katika barabara hiyo ambapo takwimu zinaonyesha kuwa mwaka 2014 idadi ya wanyamapori waliogongwa walikuwa 351, mwaka 2015 walikuwa 361 na mwaka 2016 walikuwa 218.

Alisema changamoto nyingine ni uchafuzi wa mazingira ambapo wastani wa taka ngumu zisizopungua kilo 138.3 huzalishwa kila siku na watumiaji wa barabara hiyo.

Mbali na changamoto hizo alisema nyingine ni ukosefu wa mapato ya Serikali kufuatia kukosekana kwa mageti ya kulipia tozo za utalii kwa watumiaji wa barabara hiyo ambao hufaidi utalii wa bure na kuikosesha Serikali mapato.

Alisema Changamoto nyingine ni ujangili ambao huchochewa na uwepo wa barabara hiyo ambayo hutoa fursa kwa majangili kuingia katika hifadhi hiyo kiurahisi kwa njia mbalimbali ikiwemo magari na pikipiki.

“Hifadhi inaiomba Serikali kuchepusha barabara hii ili kupunguza changamoto hizi zinazotokana na uwepo wa barabara husika na kuongeza mapato ya Hifadhi kwa kuzuia utalii a bure unaofanywa na watumiaji wa barabara wa ndani na nje,”. Alisema Kaimu Mhifadhi Mkuu huyo wa Hifadhi ya Taifa ya Mikumi.

Kwa upande wake Waziri wa Maliasili na Utalii, Dk. Hamisi Kigwangalla alisema changamoto kubwa aliyoiona katika hifadhi hiyo ni namna ya watalii kufika na kufanya shughuli za utalii katika hifadhi hiyo.

Alisema licha ya uwepo wa barabara ya lami inayokatiza hifadhini hapo, barabara hiyo sio rafiki kwenye uhifadhi. “Kuna hiyo barabara ambayo inaleta watalii hapa, ni barabara ambayo iko bize sana, ni barabara ya kitaifa na kwa vyovyote vile hii sio barabara mahsusi kwa ajili ya shughuli za utalii.

“Sisi (Serikali) tunatafakari namna ya aidha kuiondoa hiyo barabara au namna ya kuwachaji watu wanaokatiza hizi kilometa hamsini ambazo zipo ndani ya hifadhi ya Mikumi,” alisema Dk. Kigwangalla.

Katika hatua nyingine Dk. Kigwangalla amemtaka muwekezaji aliyepewa hoteli ya kitalii ya Mikumi Wildlife Lodge iliyopo ndani ya hifadhi hiyo kwa ajili ukarabati na uendelezaji kuhakikisha anakamilisha makubaliano hayo ndani ya muda aliyopewa kwa mujibu wa mkataba aliosaini na TANAPA ama sivyo atanyang’anywa kibali hicho.

Akizungumzia jitihada za kuimarisha ulinzi wa hifadhi hiyo, Dk. Kigwangalla amesema Serikali inakusudia kuharakisha mchakato wa kuanzishwa kwa jumuiya ya hifadhi ya wanyamapori ya Kidoma itakayojumuisha vijiji vya Kilangali, Doma na Maharaka ili kutengeneza buffer na hatimaye kuimarisha uhifadhi shirikishi.

Hifadhi ya Taifa ya Mikumi ilianzishwa mwaka 1964 kwa Tangazo la Serikali Na. 465 ikiwa na ukubwa wa kilometa za mraba 1,070. Mwaka 1975 Serikali iliona umuhimu wa kuongeza eneo upande wa kusini na kaskazini mwa Hifadhi na kufikia ukubwa wa kilometa za mraba 3,230 kwa tangazo la Serikali Na. 121.
Waziri wa Maliasili na Utalii, Dk. Hamisi Kigwangalla akiongea na Kaimu Mhifadhi Mkuu wa Hifadhi ya Taifa ya Mikumi, Gerald Mono wakati wa ziara yake ya kikazi katika hifadhi hiyo jana mkoani Morogoro. Uongozi wa hifadhi hiyo umeiomba Serikali kuchepusha barabara ya lami inayopita ndani ya hifadhi hiyo kutokana na athari mbalimbali za kimazingira zinazosabishwa na barabara hiyo ikiwemo vifo vya wanyamapori, ujangili na ukosefu wa mapato ya Serikali unaotokana na watu kufaidi utalii wa bure. 
Waziri wa Maliasili na Utalii, Dk. Hamisi Kigwangalla akikagua maziringira ya jengo lililoungua moto la Mikumi Wildlife Lodge ambalo linalofanyiwa ukarabati wakati wa ziara yake ya kikazi katika Hifadhi ya Taifa ya Mikumi jana mkoani Morogoro ambapo amemtaka muwekezaji aliyepewa hoteli hiyo kuikarabati ndani ya muda aliopewa ama sivyo atanyang’anywa kibali alichepewa. Kushoto kwake ni Kaimu Mhifadhi Mkuu wa Hifadhi hiyo, Gerald Mono. 

Waziri wa Maliasili na Utalii, Dk. Hamisi Kigwangalla akiongozwa  na Kaimu Mhifadhi Mkuu wa Hifadhi ya Taifa ya Mikumi, Gerald Mono kukagua mazingira ya hifadhi hiyo wakati wa ziara yake ya kikazi katika hifadhi hiyo jana mkoani Morogoro. 
 Waziri wa Maliasili na Utalii, Dk. Hamisi Kigwangalla akipata maelezo  kutoka kwa Kaimu Mhifadhi Mkuu wa Hifadhi ya Taifa ya Mikumi, Gerald Mono wakati wa ziara yake ya kikazi katika hifadhi hiyo jana mkoani Morogoro.
 Waziri wa Maliasili na Utalii, Dk. Hamisi Kigwangalla akiangalia mazingira mwanana ya  Hifadhi ya Taifa ya Mikumi wakati wa ziara yake ya kikazi katika hifadhi hiyo jana mkoani Morogoro.
Picha ya pamoja.

Sunday, 4 February 2018

Wote waliolima,kuchoma mkaa msitu malangali wakamatwe maramoja-RC Wangabo


Mkuu wa Mkoa wa Rukwa Mh. Joachim Wangabo akitoa agizo la kukamatwa kwa waliokiuka amri ya mahakama na kufanya shughuli za kibinadamu kwenye msitu wa Malangali Mjini Sumbawanga
Mkuu wa Mkoa wa Rukwa Mh. Joachim Wangabo akitoa agizo la kukamatwa kwa waliokiuka amri ya mahakama na kufanya shughuli za kibinadamu kwenye msitu wa Malangali Mjini Sumbawanga katika Mkutano wa hadhara.


Mkurugenzi wa Manispaa ya Sumbawanga Hamid Njovu akiwasilisha taarifa ya msitu wa Malangali uliopo Sumbawanga Mjini Kwa Mkuu wa Mkoa wa Rukwa Mh. Joachim Wangabo.


Mkuu wa mkoa wa Rukwa Mh. Joachim Wangabo ameagiza kuwasaka na kuwakamata wananchi wote waliokiuka amri ya mahakama ya kutoutumia msitu wa hifadhi ya Malangali kwaajili ya matumizi ya kibinadamu.

Amesema kuwa pamoja na kukamtwa, wananchi hao wasimamiwe kuhakikisha kuwa wanapanda miti maeneo ambayo wameyaharibu na kusisitiza kusakwa kwa wale wote waaofanya shughuli za kibinadamu kando ya vyanzo vya maji huku akitaja bonde la mto lwiche.

“Mpite shamba kwa shamba, kamateni watu wote ambao wamevamia kule, ule msitu uache kama ulivyo, vyanzo vyetu vya maji vitakauka, Mkurugenzi fanya msako wa bonde lote hilo kwa wale wote ambao wameanza kufyeka na kulima, kamata. DC simamia hili, tunataka kukomesha uharibifu wa mazingira wa aina yoyote ile,” Alisisitiza.

Ametoa agizo hilo katika mkutano wa hadhara alioufanya baada ya kutembelea msitu huo wa malangali uliopo kata ya Malangali, Wlayani Sumbawanga na kujione namna wananchi hao walivyoharibu msitu huo uliojaa miti ya miombo ambayo inakatwa na kugeuzwa mkaa.

Msitu huo wa Malangali ulianzishwa rasmi mwaka 1986 na aliyekuwa Mkuu wa Mkoa wa huo Mh. Tumainieli Kihwelu wenye eneo la ekari 278 kwa lengo la kupunguza mmomonyoko na vimbunga.

Wakati akisoma taarifa ya Msitu huo Mkurugenzi wa Manispaa ya Sumbwanga Hamid Njovu amesema kuwa baada ya miaka 29 wananchi waliwasilisha malalamiko ya kupokonywa ardhi na kufanywa msitu shauri lililofikishwa mahakamani na kuamuliwa wananchi hao kulipwa fidia huku hukumu ya kesi hiyo ikisitisha shughuli zote za kibinadamu kutofanyika katika msitu huo.

“Tarehe 28/4/2016 hukumu ilitolea na kuamuliwa Manispaa ya Sumbawanga kulipa fidia huku Hukumu hiyo ikisitisha shughuli zote za kibinadamu ndani ya msitu lakini bado wananchi hao walirudi kufyeka miti na kulima na tarehe 13/11/2017 Manispaa ilitoa maelekezo kwa wananchi kutoutumia msitu kwa shughuli za kibinadamu,”Alimalizia. Mmoja wa wadau wa Mazingira Mzee Zeno Nkoswe amesema kuwa usalama wa mji wa Malangali unatokana na msitu huo na kwamba endapo utaendelea kuharibiwa mji huo utafunikwa na mmomonyoko wa udongo.

MAKALA MAALUM YA WIZARA YA MALIASILI NA UTALII



Thursday, 1 February 2018

TAARIFA KWA UMMA : MAADHIMISHO YA SIKU YA ARDHIOEVU DUNIANI TAREHE 2 FEBRUARI 2018


TAARIFA KWA UMMA
MAADHIMISHO YA SIKU YA ARDHIOEVU DUNIANI TAREHE 2 FEBRUARI 2018
Tanzania pamoja na nchi wanachama wa  Mkataba wa Uhifadhi Ardhioevu (Ramsar Convention) inafanya maadhimisho ya siku ya ardhioevu duniani Fe kila mwaka. Ardhioevu ni maeneo yenye ardhi chepechepe yaliyopo kandokando na ndani ya Chemchemi, Mito, Maziwa na mwambao wa bahari wenye kina cha mita sita wakati wa kupwa. Ardhioevu pia hujumuisha Madimbwi, Mabwawa, Matingatinga na sehemu zote yanapokusanyika maji kipindi kirefu cha mwaka. Asilimia 10 ya ardhi ya Tanzania ni Ardioevu. Nchini kuna ardhioevu yenye umuhimu wa Kimataifa yajulikanayo kama Maeneo ya Ramsar. Maeneo ya Ramsar nchini yapo manne ambayo ni; Ziwa Natron yenye umuhimu wa kuhifadhi ndege aina ya Heroe Wadogo- (Lesser flamingo), Malagarasi Muyovosi  ina umuhimu wa kuhifadhi ndegemaji aina ya  Korongo Domokiatu (Shoebill Stork), Bonde la Mto Kilombero yenye umuhimu wa uhifadhi wa Puku na Rufiji mafia Kilwa uhifadhi wa Mikoko na Mazao ya Baharini.
Ujumbe wa mwaka huu ni: "Ardhioevu kwa Maendeleo Endelevu ya Miji”. Ardhioevu ni sekta endeshi ya uchumi wa nchi kwa kuwa ni chanzo cha maji yanayotumika kwenye nyumbani, kilimo, uzalishaji wa umeme na uhifadhi wa wanyamapori ambao ni kivutio cha utalii nchini. Ardhioevu huzuia majanga ya mafuriko, hupunguza athari za kiafya zinazoweza kujitokeza kutokana na madini hatarishi kama Zebaki.
Hata hivyo, ardhioevu nchini zinaharibika na zingine kutoweka kutokana na ongezeko la shughuli za kimaendeleo zisizo endelevu kama vile ujenzi kwenye vyanzo vya maji, ufugaji holela, kilimo kisichozingatia kanuni za kilimo cha kisasa na kukata miti ovyo. Athari zingine ni pamoja na vifo vya mimea maji na wanyama wanaotegemea maji kuishi na kunywa kutokana na matumizi yasiyoendelevu kama viboko, samaki na mamba.
Mamlaka inatoa wito kwa wananchi wanaoishi karibu na maeneo ya Ardhioevu kushirikiana na Serikali kuyatunza maeneo haya kwa kutekeleza sheria mbalimbali za uhifadhi ikiwemo Sheria ya Uhifadhi Wanyamapori Namba 5 ya mwaka 2009, Sheria ya Mazingira ya mwaka 2004 na Sheria zingine za kisekta kama ya Maji na Uvuvi na kuwahimiza wale wote wanaoishi kwenye maeneo ya ardhioevu na hifadhi  kuhama sawa.

Imetolewa na,

MKURUGENZI MKUU
2 February 2018

MAKALA: TAWA ILIVYOFANIKIWA KUIMARISHA ULINZI WA RASILIMALI YA WANYAMAPORI NCHINI





Mamlaka ya Usimamizi wa Wanyamapori Tanzania (TAWA) ni mamlaka iliyoanzishwa kwa Amri ya Serikali na kutangazwa kwenye gazeti la Serikali Na.135 la tarehe 9 Mei, 2014. Uanzishwaji wa Mamlaka hii ni utekelezaji wa kifungu cha 8 cha Sheria ya kuhifadhi Wanyamapori Na. 5 ya mwaka 2009.
Mamlaka ya Wanyamapori imeanza kazi rasmi tarehe 1 Julai,2016 na Makao Makuu  kwa sasa yapo hapa Morogoro katika eneo la Taasisi ya Utafiti wa mazao ya Misitu (TAFORI).
TAWA inasimamia Mapori ya Akiba 28, Mapori Tengefu 42, maeneo manne (4) ya Ardhioevu yanayotambuliwa na Mkataba wa kimataifa wa Ramsar pamoja na maeneo ya wazi yenye wanyamapori. Aidha, TAWA ni muangalizi wa shughuli za uhifadhi wanyamapori kwenye maeneo ya Jumuiya za Uhifadhi za Wanyamapori kwa jamii (Wildlife Management Areas).
Mamlaka inatekeleza majukumu yake kwa kuzingatia Sera ya Wanyamapori ya mwaka 2007, Sheria ya Uhifadhi Wanyamapori Na. 5 ya mwaka 2009 na kanuni zake. Vilevile, Mamlaka inatekeleza mikataba ya kimataifa ya uhifadhi wa wanyamapori pamoja na mazingira yao ambayo Tanzania imeridhia. Mamlaka kwa kushirikiana na Taasisi nyingine za uhifadhi wa Wanyamapori na Misitu inatekeleza Mkakati wa kupambana na Ujangili na biashara haramu ya nyara za Serikali wa miaka mitano (2014-2019).
Mamlaka ilianzishwa kama chombo cha utekelezaji wa majukumu  kwa niaba ya Serikali chini ya uangalizi wa Serikali na  kuwa na mfumo unaonesha utekelezaji wa majukumu kwa ufanisi zaidi. Kama ilivyo kwa Mamlaka nyingine nchini, lengo la kuanzishwa kwa TAWA, ni kutekeleza majukumu ya Idara ya Wanyamapori hasa ya Usimamizi wa Wanyamapori nchini. Ikiwa ni pamoja na kusimamia shughuli za utawala, ulinzi na usimamizi wa raslimali ya Wanyamapori katika maeneo yote nje ya Hifadhi za Taifa na eneo  ya Ngorongoro. Hii ni pamoja na kutekeleza kazi zifuatazo;
Kusimamia Mapori ya Akiba na Mapori Tengefu, Kusimamia na kulinda shoroba za wanyamapori, maeneo ya mtawanyiko, ardhioevu, na maeneo ya wazi yenye wanyamapori, Kuangalia Usimamizi wa wanyamapori katika Maeneo ya Jumuiya ya Hifadhi za Wanyamapori, Mashamba na Bustani za wanyamapori kwa mujibu wa miongozo inayotolewa na Mkurugenzi wa Wanyamapori.
Kusimamia migogoro kati ya wanyamapori na binadamu kwa kushirikiana na wadau wengine wa uhifadhi, Kushirikiana na sekta binafsi pamoja na wananchi katika kuanzisha na kusimamia uwekezaji katika maeneo ya wanyamapori, Kutoa, kurejea au kufuta vibali vya matumizi ya wanyamapori, Kusimamia himasheria na kukabili ujangili. Kueleimisha wadau kuhusu thamani ya  wanyamapori.
Kushirikisha wadau katika kuhifadhi na kunufaika na raslimali ya wanyamapori nchini, Kushiriki katika Utekelezaji wa mikataba ya kikanda na kimataifa Kusimamia masuala ya utawala bora katika Usimamizi wa wanyamapori na Kuendeleza na kujenga uwezo wa Mamlaka katika Usimamizi wa wanyamapori.
Moja ya sababu ya kuanzishwa TAWA ni uwezo mdogo wa utendaji wa idara ya wanyamapori uliotokana na uchache wa rasilimaliwatu, fedha na vitendea kazi.
Mafanikio
Katika kipindi cha Julai 2016 hadi Octoba 2017, Mamlaka iliendelea kuimarisha Ulinzi wa rasilimali ya Wanyamapori ndani na nje ya Mapori ya Akiba, Mapori Tengefu na maeneo ya Ardhioevu (Ramsar Sites). Muundo wa usimamizi na ulinzi wa rasilimali za wanyamapori katika Mamlaka umegawanywa katika makundi makuu mawili. kundi la kwanza linahusisha mameneja wanaosimamia mapori ya akiba 28 na “Ramsar Sites” 3; na kundi la pili ni wakuu wa kanda 8 wa Kikosi Dhidi Ujangili (KDU).
Mamlaka inashirikiana na Halmashauri za Wilaya na Jumuiya za Hifadhi za Wanyamapori (WMAs) katika ulinzi na usimamizi wa wanyamapori kwenye mapori Tengefu, maeneo ya wazi na udhibiti wa wanyamapori hatari kwa maisha ya binadamu na waharibifu wa mali za wananchi.
Kiujumla TAWA imefanikiwa kutekeleza mambo yafuatayo
Kuimarisha usimamizi wa rasilimali za wanyamapori na kuboresha uwezo wa kukusanya maduhuli, Mamlaka imeendeleza mfumo wake wa kukusanya mapato kwa kutumia mfumo wa kielektronic ili kupunguza mianya ya upotevu wa mapato.
Kutokana na mabadiliko ya mfumo wa kiraia kwenda mfumo wa kijeshi .TAWA imeanza  kuendesha mafunzo ya maandalizi ya kuingia Jeshi usu (Paramilitary) katika kambi ya Mlelele iliyoko Katika Pori la Akiba Rukwa/Lwafi Mkoani Katavi. Mafunzo haya pia yanashirikisha askari kutoka Hifadhi za Taifa na Mamlaka ya Hifadhi ya Ngorongoro. Tangu mafunzo haya yaanze tumeshapeleka Askari zaidi ya 260 ambao wameshahitimu na sasa sasa hivi kuna askari 60 wanaendelea na mafunzo hayo.
TAWA kupitia Serikali ya awamu ya Tano chini ya Mhe. Rais Dkt John Pombe Joseph Magufuli, imeendelea kukabiliana na ujangili kwa nguvu zote kwa njia mbalimbali ikiwa ni pamoja na kutekeleza Mkakati wa kupambana na ujangili na biashara haramu ya nyara za Serikali (National Antipoaching Strategy to Combat Poaching and Illegal Wildlife Trade) iliyozinduliwa Novemba, 2014.
Doria  na intelijensia ndani na nje ya maeneo yaliyohifadhiwa zinaendelea kufanyika nchi nzima.
Serikali kwa kushirikiana na  jumuiya za kimataifa zikiwemo taasisi za kikanda na kimataifa, imefanya jitihada mbalimbali kukabiliana na ujangili wa tembo. Zimeonekana dalili za kupungua kwa ujangili wa tembo nchini kutokana na jitihada kubwa ya kuimarisha doria za kupambana na ujangili hali hiyo imesaidia kukamatwa kwa silaha nyingi zilizokuwa zikitumika kwa ujangili.
Jumla ya watuhumiwa 2,053 walikamatwa kwa makosa mbalimbali na kufunguliwa mashitaka ambapo jumla ya kesi 859 zilifunguliwa. Kesi 10 + 126 zenye watuhumiwa 248 zilihukumiwa kifungo cha jumla ya miezi 8,295 na kesi 198 zenye watuhumiwa 234 watuhumiwa walilipa faini jumla ya shilingi 387,985,063/=.
Nyara za aina mbalimbali zilikamatwa katika kipindi cha kuanzia Julai 2016 hadi Oktoba 2017 kama ifuatavyo; Meno ya tembo vipande 848 vyenye uzito wa kilo 2,664.48,  Nyamapori yenye uzito wa kilo 7,790 za spishi mbalimbali na Meno 8 ya kiboko, magunia 67 ya magamba ya kakakuona, ngozi 16, na mikia 33 ya wanyamapori mbalimbali.
Mwezi Julai,2016 kilianzishwa Kikosi Kazi kiitwacho’ Wildlife and Forest Crime Unit – WCU’ kinachosimamiwa na Watendaji wa Sekta ya Wanyamapori kupitia Kanda za Kiikolojia tisa, (Tasking and Coordination Groups – TCGs) ili kukabiliana na majangili katika ngazi za juu za uwezeshaji (Facilitators) ambacho kinashirikiana na vyombo vingine vya ulinzi na usalama kupitia Muungano wa Kitaasisi.
TAWA inaamini kwamba changamomoto za ujangili na uvunaji haramu wa misitu na matatizo mbalimbali yanayohikabili uhifadhi nchini hayawezi kutatuliwa kwa mfumo wa utendaji kazi wa kiraia. Hivyo, Wizara inakamilisha taratibu za kubadili mfumo wa utendaji kazi kutoka wa kiraia kwenda jeshi usu.
Mabadiliko haya ya kimfumo ni matakwa ya Sheria ya Uhifadhi Wanyamapori Na.5 ya mwaka 2009 ambayo imeanisha kwamba kutaundwa kikosi cha jeshi usu (Wildlife Protection Unit), ili kuhakikisha ulinzi kamili wa rasilimali katika maeneo yaliyohifadhiwa.
Katika kipindi cha mwezi Agosti hadi Oktoba, 2016 kikosi kazi hiki, kimefanikiwa kukamata majangili  107, kesi 9 ziko mahakamani, Aidha, nyara, silaha, vifaa mbalimbali  vya kufanyia ujangili vimekamatwa.
Ukaguzi wa nyara umeimarishwa katika viwanja vya ndege na bandari kwa kutumia mbwa maalum wa kunusa ili kutambua nyara na kufuatilia majangili.
Doria imeendelea kufanyika kwa kutumia ndege zisizotumia marubani ‘Drons’ kukabiliana na ujangili.
Elimu ya uhifadhi ni nyenzo muhimu katika kupambana na ujangili pamoja na uharibifu wa mazingiara. Mamlaka kwa kutambua umuhimu wa dhana nii, imetoa elimu ya uhifadhi kwa vijiji (45) vinavyozunguka Pori la Akiba Selous, vijiji (19) kuzunguka Pori la Akiba Rungwa/ Muhesi/Kizigo ,Tengefu na maeneo ya wazi ambayo ni vitalu vya uwindaji wa kitalii.
Aidha, wananchi walielimishwa  kwa njia ya runinga,redio,magazeti na kugawa vipeperushi kwa wananchi katika maonesho ya Sabasaba, nane nane, siku ya utalii duniani,siku ya tembo, siku ya wanyamapori duniani na siku ya ardhioevu duniani. Majarida 585, Vipeperushi 7000, Stickers 3000, Mabango 5 yenye ujumbe wa uhifadhi vimegawiwa kwa wananchi.
Ushirikishwaji wa jamii katika uhifadhi wa Wanyamapori uliimarishwa kwa kutangazwa eneo la Jumuiya la Hifadhi ya Wanyamapori (Wildlife Management Area-WMAs) Ngorongo, Utete na Mwaseni (JUHIWANGUMWA) lililoko katika Wilaya ya Rufiji mkoa wa Pwani lilitangazwa kwenye Gazeti la Serikali (GN. Na 204 la tarehe 01/07/2016) na kufanya jumla ya maeneo yaliyotangwazwa kuwa 22.
Kushirikiana na nchi jirani (Cross border collaboration) kutanzua changamoto za uhifadhi, ujangili na biashara haramu. Katika eneo hili Tanzania inashirikiana na Msumbiji, Zambia, Uganda na Kenya kukabili ujangili unaovuka mipaka ya nchi.Hivyo, Kutokana na hali mizoga ya tembo imeonekana na meno ya tembo kukamatwa.
Changamoto
Mamlaka ya Wanyamapori bado ni Mamlaka mpya. Mamlaka  katika kufanya kazi zake imekuwa na changamoto mbalimbali zikiwemo za ujangili,mwamko mdogo wa Watanzania kutembelea vivutio vya utalii ikiwemo mapori ya akiba; ubovu wa miundombinu katika maeneo yaliyohifadhiwa, shughuli za kibinadamu hususan kilimo na uingizaji wa ng’ombe katika katika maeneo yaliyohifadhiwa na matumizi haramu ya wanyamapori.
Ujangili na biashara haramu ya meno ya tembo
Bado imeendelea kuwa changamoto  ya kiuhifadhi. Hali hii inaathiri siyo tu kuuawa kwa wanyamapori, bali pia inahatarisha utalii na usalama wa nchi yetu. Sensa ya mwaka 2014 iliyofanyika nchi nzima ilionyesha kwamba idadi ya tembo nchini ni 43,330 ikionyesha kupungua kwa idadi ya tembo kutoka tembo 109, 051 mwaka 2009, Sawa na asilimia 60.3% ya kupungua kwa idadi ya tembo katika kipindi cha miaka mitano. Pia matokeo ya sensa ya mwaka 2014 yalionyesha ongezeko la asilimia 16% la idadi ya tembo katika mfumo wa Ikolojia wa Selous-Mikumi kwa kufikia 15,217 kutoka 13,084 iliyokuwa mwaka 2013. (Chanzo:Sensa za TAWIRI.)
Mapito/Shoroba za Wanyamapori
Zinaendelea kuzibwa na uvamizi wa mifugo/shughuli za binadamu katika maeneo yaliyohifadhiwa. Hali hiyo imesababisha kuongezeka kwa migogoro baina ya binadamu na wanyamapori na kupungua kwa idadi ya wanyamapori hususani tembo ndani na nje ya maeneo yaliyohifadhiwa.

Monday, 29 January 2018

DK. KIGWANGALLA AWATAKA WALIOVAMIA KIWANJA CHA MAMLAKA YA HIFADHI YA NGORONGORO KILICHOPO NJIRO, JIJINI ARUSHA KUJIANDAA KISAIKOLOJIA


Waziri wa Maliasili na Utalii, Dk. Hamisi Kigwangalla (kulia) akipata maelezo ya eneo la kiwanja chenye hati namba 4091 kilichopo Njiro Jijini Arusha ambacho kimevamiwa na watu mbalimbali na kuanzishwa makazi yenye kaya 82 ndani ya eneo hilo kutoka Mhifadhi Mkuu wa Mamlaka ya Hifadhi ya Eneo la Ngorongoro, Dk. Fredy Manongi (katikati). Eneo hilo ni mali ya Mamlaka ya Hifadhi ya Ngorongoro na hati halisi ya eneo hilo ipo kwa jinala Bodi ya Utalii Tanzania. 
 Waziri wa Maliasili na Utalii, Dk. Hamisi Kigwangalla akikagua eneo la kiwanja chenye hati namba 4091 kilichopo Njiro Jijini Arusha ambacho kimevamiwa na watu mbalimbali na kuanzishwa makazi yenye kaya 82. Eneo hilo ni mali ya Mamlaka ya Hifadhi ya Ngorongoro na hati halisi ya eneo hilo ipo kwa jinala Bodi ya Utalii Tanzania.
  Meneja wa Huduma za Sheria wa Mamlaka ya Hifadhi ya Eneo la Ngorongoro, Egidius Mweyunge (kulia) akimuongoza Waziri Kigwangalla kukagua eneo hilo.
Dk. Kigwangalla akizungumza na waandishi wa habari baada ya kukagua eneo hilo.

WATATU WAKAMATWA NA BUNDUKI TATU ZA KIVITA RISASI 16 MAGAZINE TANO NA MENO YA TEMBO VIPANDE NNE YENYE THAMANI YA TSHS MILIONI 34,050,000


  Kamanda   Damas  Nyanda  akionyesha  gobore     lillokamatwa na  jeshi la  polisi kufuatia  msako waliofanya  jana  huko  katika  Kijiji cha  Ugalla  Wilaya ya  Mpanda .
Kamanda wa  Polisi wa   Mkoa wa  Katavi  Damas  Nyanda   akionyesha  vipande  vya  meno ya   waliokamatwa  nayo watuhumiwa   waliokamatwa wakiwa na  silaha  tatu za  kivita  story imeisha tangulia

Na  Walter  Mguluchuma .
      Katavi .
  Watu  watatu   kati ya  watuhumiwa watano  wanashikiliwa na  jeshi la  Polisi  Mkoa wa  Katavi baada ya kukamatwa  wakiwa   na  silaha     nzito  tatu  na  magazine tano  risasi  16    na  vipande  vinne  vya  mame ya  tembo yenye   thamani ya zaidi ya TSHS 34  baada ya  mabishano ya  risasi  baina yao   na  Askari   Polisi  na  Wahifadi ya  Taifa ya  Katavi  huku watuhumiwa wawili  wakiuawa katika tukio  hilo .
Kwa  mujibu wa  taarifa  iliyotolewa  mbele ya  Wandishi wa  Habari  hapo  jana  na   Kamanda wa  Polisi wa  Mkoa wa  Katavi  Damas   Nyanda  alisema tukio  hilo   hilo  la kamatwa kwa wathumiwa  hao  watatu na wawili kuuawa  lilitokea  hapo  juzi   majira ya saa  sita  usiku  huko  katika   Kijiji  cha   Kapalamsenga   Wilaya ya  Tanganyika   Mkoani   Katavi .
  Alisema  watuhumiwa  hao walikamatwa  kufuatia   msako   mkali  uliofanywa   kwa muda wa wiki tatu    na  Jeshi la  Polisi na  Askari wa  Hifadhi ya  Taifa ya  Katavi  ambao walipata taarifa juu ya watu hao kujihusisha  na  maswala ya ujambazi na  ujangili  ndani ya  Hifadhi ya  Taifa ya  Katavi .
Baada  ya      kuwa  wamepata  taarifa  hizo  ndipo  walipo  fanya   msako  huu  uluodumu  kwa  muda wa wiki  tatu  za  kuwasaka  watuhumiwa  hao  ulikuwa ukifanyika  usiku  na   mchana .
Kamanda  nyanda   alieleza  ndipo  hapo  juzi   Askari  hao  walipofanikiwa  kuwakamata watuhimiwa   hao   baada ya  mabishano   makali ya kurushiana  risasi  ambapo  katika  tukio  hilo  watuhumiwa  wawili   kati ya  watano waliweza kuuawa  kwa  kupigwa  risasi .
 Alisema  baada ya    kutiwa  nguvuni   watuhumiwa  hao  walikamatwa  wakiwa  na   bunduki    tatu za  kivita   aina ya  SMG  ,risasi   16,  magazine  tano  na  vipande  vinne    vya  meno  vyenye  uzito wa kilo 6.6  yenye  thamani ya  Tshs  34,050,000.

Pia  watuhumiwa  hao  walikamatwa  wakiwa  na    nyama  ya  pofu  kilo   20   zenye  thamani  ya  Tshs 3,859,000 wakiwa wamehiifadhi  ndani ya  mfuko  wa   sandarusi .
  Kamanda  Nyanda   alisema  watuhumiwa  hao  wanaendelea kushikiliwa  na   jeshi la  polisi  na  wanatarajiwa kufikishwa   Mahakamani   mara   baada ya   upelelezi  utakapo kuwa  umekamilika .
  Kamanda  Nyanda   ametowa  wito  kwa  watu  waheshimu  sheria  na waache  kufanya  uhalifu  kwani  maisha ya uhalifu  ni  mafupi na   amewataka  wananchi  wanapokuwa wameona  viashiria vya uharifu watowe  taarifa  kwenye  vyombo husika .
Mkuu  wa  Hifadhi ya  Taifa ya  Katavi   Izumbe   Msindai   alisema  ushirikiano wa       Askari wa  Hifadhi ya  Taifa   ya   Katavi na   Polisi  ndio  umefanya watuhumiwa  hao kukamatwa .
Alisema   Hifadhi ya   Katavi  wataendelea  kushirikiana  na   wananchi  wanao  zunguka   hifadhi  hiyo   katika  kukabiliana  na  swala   zima    la   ujangili  wa  wanyama  ndani ya  Hifadhi na  nje ya  Hifadhi.

IDADI YA MATUKIO YA KUUAWA KWA TEMBO KATIKA HIFADHI YA KATAVI YA SHUKA.



  Na  Walter  Mguluchuma .
         Katavi  .
  Idadi ya    ya  matukio ya kuuawa kwa  Tembo  katika   Hifadhi ya   Taifa  ya   Katavi  imeshuka  kutoka   tembo  24 kwa  mwaka  2016  hadi  kufikia   tembo     Tembo  watano  kwa  kipindi  cha  mwaka  2017 kufatia kuimarika  kwa  dolia   ndani ya  hifadhi  hiyo  na  nje ya  hifadhi .
    Hayo  yalisemwa  hapo  jana  na  Mkuu  wa   Hifadhi ya  Taifa  ya  Katavi   Izumbe   Msindai   wakati  alipokuwa   akizungumza  na   wandishi wa   habari  hapo  jana    Mkoani    Hapa .
Alisema   matukio   ya  kuuawa  kwa  tembo     ndani ya   Hifadhi ya  Taifa  ya   Katavi  yanaendelea   kushuka  kutokana  na kuimarishwa  kwa  dolia  na   ushirikiano  wanaopatiwa  na   wananchi  wanaizunguka  hifadhi  hiyo.
  Alifafanua  kuwa   kwa  kipindi cha  mwaka  2016 jumla ya  tembo   24 waliuawa    ndani  ya   hifadhi ya    Katavi na  kipindi  cha  mwaka 2017  tembo waliuawa ni  watano   na  kwa  mwaka huu wa  2018    kuna  tukio  moja  la  kuuawa kwa  tembo  mmoja   hadi  sasa .
   Alisema   hari ya   ujangili  ndani  ya   Hifaadhi  na  nje  ya   hifadhi   bado  ipo  kutokana   na   viashiria   hivyo   vya kuuawa   kwa  tembo  hao    katika   kipindi  hicho  cha  miaka   miwili  hivyo  matukio  hayo   hawaja yafumbia  macho .
  Msidai      alieleza  kuwa   hifadhi  ya   katavi   inakabiliwa  kubwa  sana ya   uongezeko la   mifugo   kuingia   ndani ya    Hifadhi  kwani       baadhi ya wafugaji wao  wanategemea  malisho ya mifugo yao  kwenye   maeneo  yaliohifadhiwa  wakati ni kinyume  cha    sheria .
  Alisema    kadri  siku   zinavyokuwa      zinaongezeka   na  ndio  matukio ya  kukamatwa  kwa  mifugo  ndani ya   hifadhi yamekuwa yakiongezeka  na  hasa   mifugo  inayohamishiwa     huku  kutoka  mikoa  ya   kanda ya  ziwa .
   Alitaja   aeneo  la    Wilaya  ya   Mlele  linalopakana   na   hifadhi  kwenye    Tarafa  ya   Mpimbwe  ndiko   kuna    changamoto   kubwa   sana   ya  mifugo  kuingia  ndani ya   hifadhi  na  wamekuwa wakiwachukulia  hatua  mbalimbali  wafugaji wanawakamata   akiwemo  kuwafikisha  mahakamani